من الاختراعات الحلوه اللي لقيتها في موقع كيكستارترز
كوب القهوه اللي ممكن ينضغط ويصغر حجمه بعد الانتهاء من شرب قهوتك
وتقدر تشيله في جيبك او بالجنطة
وتغسله في البيت لاستخدامه مرات متكرره
الكوب مصنوع من مواد صديقة للبيئة ومايسرب القهوه وسهل تنقله وتخزينه
وسعره حوالي ٥ دنانير
حاليا المشروع قيد الانشاء وفي حجز باسعار ارخص قبل لا ينزل السوق
ويوصلكم في شهر اكتوبر
وصلني من مركز بيان لطب الأسنان نقصه
جنجفه مع قيد للعبة الهند ،
الحلو فيها ان صور الجيكر و الباش و الميمه و الغلام غير
عباره عن مشاهير أجانب بلبس كويتي شعبي ،
راح آخذها للدوانيه اكيد الشباب راح يستانسون عليها بس بعد رمضان عشان ما نلهيهم ،
مشكورين بيان على الجنجڤة
Filed under: Accessories, Cool Stuff, Dental, Fun, Game, Health 
عطورات أيار منزلين صندوق العيد
بعبلة لونها ابيض بسيطة وفخمة للتقديم
فيها رشوشين وعطرين وزعفران ومعمول
عطر الشيخ وعطر لمار
زعفران اسباني درجة اولى ومعمول
هدية حلوه للاهل في العيد
هذا حسابهم الانستغرام
محلهم في برج جاسم
وهذا رقمهم للطلب والاستفسار
55501991
عيدكم مبارك مقدما ويعطيكم العافية عالعيدية :)
عطلة عيد الفطر هالسنة كانت طويله وحلوه
واستغليناها بسفره سريعة لدبي
اول مره نعيد بره الكويت وكان العيد في الامارات عجيييب وكسر للروتين المعتاد في كل عيد
على طول حجزنا في منتجعنا المفضل الجميرا
في فندق ميناء السلام
نفضل منتجعات الجميرا في دبي لان فيه مميزات حلوه
مثل شاطئ خاص كبييير ومطل على برج العرب
دخول مجاني لمدينة وايد وادي المائية يوميا
مطل الفندق على نهر صناعي والتنقل فيه بالقوارب اللي يسمونها العبرة
فيه ٤٤ مطعم راقي
نادي للاطفال فيه العاب للاطفال وفيه حمام سباحة صغير مع زحلاقيه ورشاشات ماي للاطفال
سوق مدينة الجميرا سوق صغير فيه انتيكات وتذكارات
باختصار مانحس بالملل وما يحتاج نطلع من الجميرا
من قبل كتبت عن تجربتنا في فندق ميناء السلام
بس لما زرناه هالمره كان الفندق مجدد والاثاث جديد
والتصليحات بتنتهي في شهر سبتمبر
يتميز لوبي الفندق بهذا الحوض اللي متروس ورد جوري فريش
زرنا الفندق في اخر يوم رمضان
ولحقنا على ديكورات رمضان والافطار فيه
هذا شكل الغرفة بالديكورات الجديده
صارت موديرن اكثر
الغرفة حجمها كبير وراهي ومريحة
النظام فيها كله باللمس
الاضاءة والتكييف وزر عدم الازعاج وزر تنظيف الغرفة موجود على الكميدينات
الحمام ماتغير مثل السابق
الصابون والشامبو وكل اغراض الحمام تكرمون من أمواج
المنظر المطل من غرفتنا
خيااال
تحتنا السلاحف
كل يوم حاطين لنا شكل جديد :)
في كل ليلة لازم يحطون لنا كاكاو باتشي مع شي اخر
صباح يوم العيد
حلويات مشكلة
ثاني العيد
ثالث العيد
تفاجأت بهذي العلبة
من كااااارتييير مستحيييل
طلع كاكاو :(
خيبه امل :(
عالاقل حطوا خاتم سلسله فص اي شي :)
بس كان الكاكاو سويسري لذيذ
في الممرات المائية بالفندق
الشاطي كبير ونظيف وموفرين جميع انواع الالعاب البحرية
ويبين من بعيد فنادق نخلة الجميرا ومنهم اتلانتس
من شاطئ مينا السلام
شكل الفندق بالليل
ثاني زياره لنا لفندق ميناء السلام وثالث زياره لنا لفنادق الجميرا في دبي
فخم هادي مريح ممتع
وماعندنا اي مانع للسكن فيهم مره ثانية بالمستقبل
تم افتتاح مجمع مطاعم ٦٠ زون في المباركية
اللي يشمل على ٣ مطاعم
رومية ووانيت وميني مي
المطعم شرح وقعدته حلوه واطباقه تناسب كل الاذواق
رومية اكل كويتي ومشاوي
وانيت شغلهم مندي ومنسف واطباق هنديه
ميني مي سندويشات وسلطات
ممكن تطلب من اكثر من مكان وتاكلونه على نفس الطاوله
ديكوراتهم وايد حلوه وفينتاج
كل الكاميرات قديمه واثريه
حجم الاطباق راهي يكفي شخص اكيل او شخصين يبون يتشاركون باكثر من طبق
مرقوق وتشريبة وقبوط
طعمهم مثل طباخ البيت نظيف ولذيذ
جريش وهريس لحم
معكرونه بالدجاج
لذيييييذه حبيتها واايد ناااطعه
مجبوس لحم
اللي جربه مدحه وايد لذيذ وترف
مجبوس الدجاج
جربته وايد حلو والدياي ترف
بلاليط وتختارون البيض المقلي على الطريقه اللي تحبونها
تشكيلة حمص بانواع مختلفه مع المتبل
حبيت حمص الشمندر لاااازم تجربونه
كبة باللبن
مشويات
دجاج وتكا وطاووق وكباب
تكا لحم
كباب
طبق مشويات مشكله
يقدمون عصاير مختلفة والفيمتو واللبن
قهوة عربية عالفحم
اللقيمات
جيزكيك الفيمتو
لذيييذه لاتطوفكم لازم تجربونها
شاي عالفحم
عندهم تشكيلة من الحلويات
مثل ام علي وفطيره التفاح ومحلبيه الورد واللقيمات والجيزكيك
كل هذي الاطباق كانت في مطعم رومية
ونزلوا لنا معظم الاطباق لتجربتها وتصويرها
مو عبالكم كل هالاكل كلناه :) جربنا بعضهم ذواقه
وهذي السندويشات من مطعم ميني مي
كلوب وراب وسندويشات وسلطات
بعد ماتختارون الصمونه يقدمونها لكم بهالشكل
ومن اطباق مطعم وانيت
البوري والسمبوسة
الاكل لذيذ وفريش مثل شغل البيوت
واسعارهم معقوله جدا مثلا الطبق الرئيسي يتراوح من دينار ونص لي ٣ دنانير
مكانهم وقعدتهم حلوه
فاتحين من ١٢ الظهر الى ١٢ بالليل
٦٠ زون او سلسلة مطاعم رومية
متواجدين في المباركية مقابل مطعم الشمم الجديد اللي كان فيلا مودا سابقا
Filed under: Food 
في زيارتي الاخيرة لدبي
في فندق ميناء السلام في مدينة الجميرا
بحثت عن مطعم قريب علينا في موقع تريب ادفايزور
وطلع لي مطعم باي تاي التايلندي وتقارير الناس عنه وايد زينه وترتيبه بين مطاعم دبي عالي
(فحجزنا فيه (اغلب مطاعم الفنادق تحتاج حجز
موجود في فندق القصر اللي بجانبنا في نفس مدينة الجميرا
وطريقه الذهاب للمطعم عن طريق القارب او العبرة بالنهر الصناعي لمدينة الجميرا
قدموا لنا شبس الربيان كضيافة علما توصل الاطباق
المقبلات اللي طلبناها
Tom Yam Kung Soup
شوربة التوم يام البحرية السبايسي الحاره
لذيييذه جدا
ودايما اطلبها بأي مطعم اسيوي يوفرها
KUNG YANG
ربيان مشوي لذيذ
PLHA NUEA MA KHUA PHO
سلطة اللحم المشوي
طلبناها بدون باذنجان
كانت روووووعة
PHAD THAI KUNG SOD
باد تاي
نودلز التايلندي الشهير مع ربيان
كان من ألذ الباد تاي اللي جربته
جربت اكثر من طبق باد تاي بالكويت الى الان ماذقت مثل هذا بلذته
Beef Pepper
لحم بصلصه الفلفل الاسود
كان حلو
Vegetable Fried rice
عيش مقلي بالخضار كان لذيذ
ولبنتي طلبنا ربيان مفيوح فقط مع نودلز ساده
طبقها المفضل وعطونا اياه مجانا
المطعم لذيذ والخدمة ممتازة وصج يستحق شهادة الامتياز من موقع تريب ادفايزور
كل الاكل حلو ولذيذ ومافيه اي زفره
اللي يحب الاكل الصيني الاسيوي لازم يجربه اذا راح دبي
اسعاره تعتبر غاليه شوي
اعطيه تقيمي الشخصي ١٠ / ١٠
المطعم يفتح للعشاء فقط من ٧ بالليل
Pai Thai AlQasr – Madinat Jumeirah Resorts
مو اول مره اجرب البسبوسة من بسبوسة بوتيك
كانت لي تجارب سابقة لذيذة معاهم
جربت عندهم الميني بسبوسة بالرابط
وجربت عندهم بسبوسة بالمهلبية العجيييبة بالرابط
“وهالمرة منزلين “سلة النقصة
سلة شكلها يشوق وذربه وااايد
وحلوة الواحد يهديها للي يعز عليه
وهذي الشغلات اللذيذة اللي فيها
(قرشتين زجاج (جارز
فيهم بسبوسة ميني نوعين حجمهم يشوق كبر المية فلس
مع انواع من المحلبية بالبسبوسة او المهلبية بالنكهات
والقهوة العربية المهيلة بالمطاره و٦ فناجين زجاج
مع الورد الطبيعي
بسبوسة النوتيلا
بسبوسة القشطة
ترفه ولذيذة ورطبة مو ناشفه
كعادتهم لذيذه ماتغيرت علي
القهوة العربية المهيلة اللذيذة
مع فناجينها
محلبية بالبسبوسة بالنكهات
زعفران وفستق وورد وسادة
حبيتها وايد
قبل جربت الحجم الكبير وهالمره الحجم الميني بعد حلو
كل هالشغلات موجودة بسلة النقصة
اللي يبي بسبوسة تقديم ميني بالنكهات
او محلبية البسبوسة
يطلب من بسبوسة بوتيك واهو مغمض
واسعارهم معقولة جدا
للطلب من بسبوسة بوتيك
94467617
Instagram & Twitter
يعطيكم العافيه عالشغل المميز
تم بحمدالله تحديث برنامجنا كيفي
عالاب ستور للايفون والايباد
ويحتاج اي او اس ٦ وفوق iOS 6
وحلت مشكله الكراش
تقدرون تنزلون البرنامج – مجاني
عالروابط
ابل اعلنت رسميا عن موعد مؤتمرها القادم
في تاريخ ٩ سبتمبر
والمتوقع الاعلان عن جهازين ايفون جدد
وساعه ذكيه جديده
حلو الزواره اليوم برعاية
ألبا دولشي
جربنا نوعين حلو
AD Choco
حلو كيك الكاكاو
طبقة بسكوت عليها كيك كاكاو ترف وصلصه بيضا
ومغرقينه كاكاو ساااايح
طعمه بالضبط مولتن لذيييذ
حبيته وااايد
اللي يحب سوالف المولتن والكاكاو الدسم اكيد راح يعجبه
Frozen Heat
هذا الحلو الثاني
عباره عن طبقه كيك كاكاو مع صلصه كاكاو سايحه وعليها طبقه بيضا
طعمها مثل الجيزكيك
ومعاهم ايس كريم على جنب اللي بالقرشه
كان طعمه حلو
وصلنا الايس كريم ذايب
ما ألومهم على هالحر اكيد بذوووب
كان المفروض نحطه بالفريزر الايس كريم بس ما نطرنا واكلناه مع الحلو
حبيت حلو كيك الكاكاو اكثر من هذا لاني احب سوالف المولتن
عندهم تشيكله حلويات اكثر في حسابهم الانستغرام
وهذا رقمهم للطلب والاستفسار
97808333
يعطيكم العافيه عالشغل المميز
Filed under: sweets Tagged: alba, alba dolci, cacao, cheesecake, Choco, chocolate, cocoa, deliciuos, delivery, dolci, Heat, home made, molten, order, sweet, كاكاو, لذيذ, مولتن, جيزكيك, شيزكيك, شغل بيت 
نظارات نوك ارواند هي ماركة امريكية من كاليفورنيا
نظاراتهم عملية وشبابية وعالموضة وحلوين للبحر
واسعارهم معقولة جدا
وصلتني نظارتين ولفوا عالعايلة كلها :)
هذا حسابهم الانستغرام للي يبي يشوف باقي موديلاتهم والوانهم
وهذا رقمهم للطلب
94416625
ثانكس عالنظارات الكووول :)
فيلم امس بالبيت كان برعاية نفيش بوبكورنبوليس
معروف عن نفيشهم لذيذ وفريش ومن امريكا لوس انجليس
٣ نكهات لذيذه امس جربناهم
الزيبرا بالكراميل والكاكاو الابيض وكاكاو بالحليب
الدايجستيف بالبسكوت
كيتيل كورن اخف واحد فيهم بالسكر او بالشيره الخفيفه حبيته اكثر واحد لان مايغث
مع الفراولة بالكاكاو :)
احلى سناك خفيف مع الفيلم بالبيت
عندهم توصيل للمنازل
22286888
ومحلاتهم مول٣٦٠ ، الافنيوز، المارينا، دسكفري، البيرق
مشكورين عالنفيش :)
رالف لورين اعلنت عن اول تي شيرت ذكي
ينقل معلومات وتفاصيل جسمك اثناء الرياضه
الى الايفون مباشرة
هذا التي شيرت تم تصميمه مع شركة او ام سيغنال عندهم خبراء الاعصاب ومهندسين لصناعه تي شيرت مصنوعه خيوطه من تقنيه الاستشعار اللي توصل بكل دقه كل معلومات جسمك مع قطعه قصيره تركب عالتي شيرت تجمع وتخزن المعلومات
مثل سرعه دقات القلب والتنفس ويعطي ارشادات لتعديل طريقه التنفس انها مو مضبوطه حاليا ولازم تتنفس اعمق ونفس الشي لدقات القلب ان ماوصلت للعدد المطلوب لدقات القلب في التمرين
ويحسب قوة الحركه والتمرين والمسافه والسعرات الحرارية المحروقه.
بس عليك تلبس هالتي شيرت اثناء رياضتك لمعلومات كامله عن ادائك وتحسينه بنفس الوقت.
الماركة معروفه وشكل التي شيرت حلو
لكن ماذكروا سعره ولا وقت نزوله
ممكن ينزلون بالمستقبل تي شيرتات للنساء وممكن يشتغل عالاندرويد ايضا
لكن شركة او ام سيغنال اللي تصنع التيشيرتات
عندها طلبات مسبقه للتيشيرتات ماركة او ام
ويوصلون نهايه نوفمبر
هذا رابط كولكشن او ام واسعارهم وعندهم توصيل للعالم
مؤتمر ابل القادم للاعلان عن ايفون ٦ والساعة الذكية
في تاريخ ٩ سبتمبر
وبدا الناس في التخييم امام محل ابل في نيويورك قبل ٦ ايام من المؤتمر
ومعروف في المؤتمر يتم الاعلان الرسمي فقط للايفون
وبعد ١٠ ايام ممكن في ١٩ سبتمبر ينزل الايفون ٦ رسمي في محلاتهم
معناته راح ينطرون حوالي ٢٠ يوم امام محل ابل
سامسونغ اعلنت عن جهاز الجلكسي نوت ٤ الجديد
التطوير الجديد بالجهاز عن سابقه النوت ٣
الاطار المعدني للجهاز يعطيه فخامه وقوه تحمل اكثر
والجهاز من الخلف من الجلد
الشاشة اكبر ٥.٧ انش مقارنه بالسابق ٥.٥ انش
ووضوح الشاشه افضل من السابق
سرعه الجهاز اصبحت اسرع من السابق
والقلم المستخدم مع الجهاز اصبح اسرع وادق
تم اضافة نظام البصمة ودقات القلب ونظام مقاومة الماء والغبار
الكاميرا اوضح من السابق ١٦ ميغا والامامية ٣.٧ ميغا
4K وتصوير الفيديو عالي الوضوح بتقنية
والبطارية اكبر
لم يتم ذكر السعر
وسيتم طرحه بالاسواق في شهر اكتوبر
اللي عنده جلكسي نوت ٣ اكيد راح يحب نوت ٤ اكثر
يسر مجموعة بهاء فوتوفريندز تقديم دورة مبادئ التصوير (المصور المميز) لمدة 5 ايام
من 13/9/2014 الى 17/9/2014
من الساعة 4.30 الى الساعة 7.30 مساءا
السبت
الاحد
الاثنين
الثلاثاء
الاربعاء
محتوى الدورة : مواصفات المصور الناجح -كيف تختار كامرتك من ناحية الوظائف -كيف تختار للعدسات المناسبة -الاخطاء الشائعة في التصوير -مقدمه عن ( فتحة العدسة -سرعة الغالق – حساسية الفيلم)
مقدمة في تعديل الصور بالفوتوشوب
سيقدم الدورة استاذ التصوير المحترف بهاءالدين القزويني
سعر الدورة
لغير الاعضاء
85 د.ك
للاعضاء 75د.ك
عدد المقاعد محدود 8 اشخاص فقط لضمان مقعدكم يرجى سرعة التسجيل
للتسجيل يرجى الاتصال بالارقام التالية
واتس اب 55070099
55546562
ويمكنكم زيارة موقعنا
Www.bahaaphoto.co
بوبكورن نيويورك ماركة نفيش جديده بالكويت
من امريكا
الحلو في هذا النفيش وحسيت انه يميزه عن باقي النفيش بالكويت
انه مغلف باكياس باحكام ويظل فريش لمده سنة
ممكن تحطه بالكبت وتاكله بعد شهر او شهرين عادي مايخترب على عكس باقي الانواع اللي تظل يومين وترطب
لازم تأكلونه بهاليومين او ترميه
اللي لفت نظري بالنفيش ان فيه نكهات غريبه وجديدة من ال٣٠ نوع عندهم
مثلا بامريكا في نكهه البيتزا والشيزبرغر
وعندنا في الشرق الاوسط نكهه الشاورما والكباب وليمون بالفلفل الاحمر
وشرق اسيا نكهاتهم بالواسابي والتوم يام والغرين كاري
بس متوفره حاليا ٦ نكهات مختلفة بالكويت
جربت نكهه الجبن كانت مالحة لذيذه
ونكهه الزبدة كانت بطعم الزبده المالحه الحالية
ونكهه الاوريجنال كانت طعمها ذره بالسكر
وباقي النكهات
ملح وفلفل اسود
بصل مع كريمة حامضة
سبايسي باربيكيو
بناتي حبوا النفيش وايد
النفيش لذيذ ونكهاته متنوعه ويظل فريش مده سنه ممكن تخزنونه
وتفتحون واحد كل مره تشتهون نفيش
هذا تلفونهم للطلب من الكويت
90969600
مشكورين عالنفيش الحلو
ومشكوره لايف وذ ايوت عالنقصة ❤️
@lifewithayout_
ابل اعلنت في مؤتمرها عن الايفون ٦ والايفون ٦ بلس وعن ساعه الابل
الساعه متوفر منها ٣ انواع
Apple Watch
Apple Watch Sport
Apple Watch Edition
ساعة الابل مصنوعه من الستانليس ستيل بلون الستيل او باللون الاسود
مع ٦ انواع من الاحزمه للساعه ممكن تبدلها بكل سهوله
مثل الستيل او الجلد او المطاط بانواع والوان مختلفة
اما ساعة الابل الرياضية مصنوعه من الالمنيوم القوي والزجاج المقاوم للكسر بلونين السلفر والاسود
مع احزمة مطاطيه بألوان ملفته
وساعة الابل الايديشن مصنوعه من الذهب القوي مع احزمه فاخره للساعه
متوفر من الساعه حجمين كبير وصغير يناسب حجم اليد
من خلال ساعه ابل ممكن ترد على المكالمات على ايفونك
ارسال الرسائل والرد عليها
نظان اللمس فيها متطور جدا بحيث يفرق بين اللمس والضغط عالشاشه
عده خلفيات للشاشه
فيها نظام للياقه والرياضه والصحه
الساعه تناسب الايفون ٥ و٥ اس و٥ سي وايفون ٦ و٦ بلس على نظام الاي او اس ٨
سعرها يبدا من ١١٥ دينار
ومتوقع نزولها بالاسواق في بداية سنه ٢٠١٥
فيديو مفصل رسمي عن انواع الساعات
ابل اعلنت بالامس عن الايفون ٦ والايفون ٦ بلس
بحجمين اكبر وانحف من السابق لكن الوزن اثقل قليلا من الايفون ٥ اس
بحجم ٤.٧ انش و٥.٥ انش مع شاشة الريتنا عالية الوضوح
مع معالج اقوى من السابق أ ٨ لسرعه وكفاءة اكبر للجهاز
الكاميرا نفس الوضوح السابق ٨ ميغابكسل
لكن تم تطويرها مع فلاتر لصور افضل في الاضاءه الضعيفة وفيها التركيز التلقائي للصور مع التقليل من اهتزاز الشاشه
تصوير الفيديو عالي الجوده مع التركيز التلقائي
اما الكاميرا الامامية نفس المواصفات بالسابق ماتغيرت
الواي فاي اصبح اسرع ٣ مرات وال تي اي اسرع ايضا
سعته البطارية اكبر من السابق
نظام الدفع الجديد بالايفون عن طريق تخزين بطاقات البنك بالايفون والدفع في المحلات عن طريق الايفون فقط بنظام البصمه
مع نظام الاي او اس ٨ الجديد
وتم الاعلان عن ساعه ابل ايضا في المؤتمر تفاصيلها بالرابط
سوف ينزل الجهازين ايفون ٦ و٦ بلس في الاسواق تاريخ ١٩ سبتمبر
اسعارهم بدون عقد ومفتوح
ايفون ٦ / ١٦ غيغا ب ١٨٥ دينار
ايفون ٦ / ٦٤ غيغا ب ٢١٥ دينار
ايفون ٦ / ١٢٨ غيغا ب ٢٤٤ دينار
ايفون ٦ بلس / ١٦ غيغا ب ٢١٥ دينار
ايفون ٦ بلس / ٦٤ غيغا ب ٢٤٤ دينار
ايفون ٦ بلس / ١٢٨ غيغا ب ٢٧٢ دينار
الفيديو الرسمي للايفون ٦ و ٦ بلس
